Олоҥхо театырыгар "Сылгы уола Дьыырай Бухатыыр"

Мэҥэттэн төрүттээх олоҥхону толорооччу, ылбыт үөрэҕинэн худуоҥунньук, Николай Баишев былырыын Виталий Власов ыҥырыытынан Олоҥхо театырыгар кэлбит. Илин эҥэргэ киэҥник биллэн, үгүс олоҥхоһут толоро сылдьыбыт айымньытыгар артыыс быһаччы сыһыаннаах буолан биэрдэ.

Николай Баишев 10-ча сыллааҕыта бэйэтин илиитинэн кыһан оҥорбут мааскалара олоҥхо ис хоһоонун өссө дириҥэттилэр, геройдар уобарастарын чуолкайдык биэрдилэр. Азия дьоно үксэ мааскаланалларын көрөн, олоҥхо дойдутун маскаҕа түһэриллибит уобарастара бастаан утаа кыраныысса таһыгар баар көрөөччүлэргэ анаан оҥоһуллубуттар. Онуоха бу туруорууга мааска артыыс илиитигэр ураты тыыннанан, дорҕооҥҥо сөп тубэһэн олох атын эйгэни үөскэттэ. Олоцхо-синтез-спектаакыл театырга саҥа жаанр.

Устата-туората биллибэт Олоҥхо дойдутун кэпсэнэр ырыата, тойуга төрүт дорҕоон, тыыннаах доҕуһуол этиитинэн барар. Маныаха сүҥкэн оруолу музыкант, норуоттар инструменнарын историятын үөрэтээччи, пропагандалааччы Николай Орлов буолла. Республика араас муннуктарыттан инструменнары хомуйбута 33 сыл буолбут.

Спектээкилгэ улахан көмөнү искусство үтүөлээх деятелэ, Кыыл Уола үҥкүү театрын оркестрын салайааччыта Николай Петров оҥорор. Сыанаҕа 7 артыыс бииртэн биир уобарска киирэн, төрүт дорҕоон матыыбын, инструменнар тыастарын таһааран көрөөччүнү «Сылгы уола Дьыырай Бухатыыр» олоҥхолуу омуннаах олоҕор илдьиэхтэрэ.

Ньургуйаана Егорова, Илья Жараев, Саха телевидениетэ, Дьокуускай. 

Источник: НВК Саха

Вернуться назад