Ийэ тыл - Виталий Власов

Ийэ тыл

Төрөөбүт төрүт тылым
Бу тыынар салгыным курдук,
Иитиллибит ийэ тылым
Бу иһэр утаҕым курдук.

Саҥарбыт саха тылым
Үөскээбит алааһым курдук,
Ыллаабыт ытык тылым
Үүт хатыҥ чараҥым курдук.

Сахам тыла сирэйдээх-харахтаах
Киһи курдук тыынар тыыннаах,
Сахам тыла үөһэттэн ыйаахтаах
Ис кистэлиҥ кистиир кыыннаах.

 

Халлаантан айылҕа сүөгэйэ
Сахам тыла түһэр,
Иннибэр нарыннык күөгэйэ
Ийэ тылым иһэр.

 

Ийэм үүтүнүү испитим -
Ийэ тылым илгэтин,
Өҥнөөх кустугу сиппитим -
Айар имэҥим билгэтин.

 

Сахам тыла эн -
Ардах уонна түптэ сыттааххын,
Сахам тыла эн -
Дьэдьэн уонна сүөгэй амтаннааххын.

 

Ийэлээх аҕам тылларын кытары
Биир тыллаахпын,
Төрөөбүт тылым тыыннааҕын тухары
Мин тыыннаахпын.

 

Тыл -
Өлбөт мэҥэ уута.

 

Олоҥхолоох омук - тыла да, бэйэтэ да хаһан да сүппэт, хайдах да өлбөт!

 

Тыл -
Дьону эмтиэҕэ,
Тыл -
Суоҕу этиэҕэ.

 

Тыл сыппыыр сылларыгар
Сынньанан ылыыһыкпын,
Өлбүттэр тыалларыгар
Күрэнэн хаалыыһыкпын.

 

• Күннээх дьолбут
Саха тыла,
Ордор суолбут
Дойду тыла.

• Мин тылларым
Ыллана туруохтара,
Ырыаларым
Кэлэри суруохтара.

• Улдьаам
Кыл,
Буулдьам
Тыл.

• Амтаннаах аҕыйах тыл
Аһара да алыптаата,
Алыптаах арыылаах тыл
Ап баайынан ыһыктаата.

• Сахам тыла кынаттаннын,
Аар айымньы айылыннын.

• Тыалтан тылы
Умналыыбын,
Тыллаах тыалы
Муоһалыыбын.

• Тыл өҥүн
Билэбин,
Тыл күөнүн
Истэбин.

• Кэпсээбит кэрэ тылым
Киэһээҥҥи кии түптэм курдук,
Истибит истиҥ тылым
Дьэдьэннээх сүөгэйим курдук.

Үөрдүбүт үтүө тылым
От охсор ходуһам курдук,
Дьоллообут дьоһун тылым
Ыһыспыт ыһыаҕым курдук.

Ийэбин иэйэр тылым
Иэйиэхсит илдьитим курдук,
Аҕабын ахтар тылым
Айыыһыт алгыһым курдук.

Виталий Власов
©

Вернуться назад  

Иван Шакуров

И.Ю. Пестряков

Афиша

"Саха дьахталларын мэтириэттэрэ" Бүлүү улуустарыгар айанныыр
Көрөөччү сэҥээриитин ылбыт номнуо уос номоҕо буолан кэпсэнэ сылдьарОлоҥхо театрын саҥа испэктээкилэ"Саха дьахталларын мэтириэттэрэ"Бүлүү улуустарыгар...

Поиск